عالمی شہرت یافتہ برطانوی جریدے فنانشل ٹائمز نے انکشاف کیا ہے کہ پاکستان اور امریکا کے تعلقات میں ایسی غیر معمولی اور حیران کن پیش رفت ہوئی ہے جس نے بھارتی ایوانوں میں بےچینی اور تشویش کی لہریں دوڑادی ہیں۔
یہ ڈرامائی تبدیلی حالیہ مہینوں میں ہونے والے اعلیٰ سطحی سفارتی رابطوں کا براہِ راست ثمر ہے۔ وہ رابطے جنہوں نے ماضی کے سرد اور بےرنگ تعلقات کو گرمجوشی، اعتماد اور شراکت داری میں ڈھال دیا۔ اس تبدیلی کے مرکز میں پاک فوج کے سپہ سالار، فیلڈ مارشل جنرل عاصم منیر کا غیر معمولی اور فعال کردار نمایاں ہے، جنہوں نے صرف ایک موسمِ گرما میں دو بار امریکی سرزمین پر قدم رکھ کر نئی تاریخ رقم کی۔
جنرل عاصم منیر کا تازہ ترین دورہ امریکی ریاست فلوریڈا کا تھا جہاں وہ امریکی سینٹرل کمانڈ کے سربراہ جنرل مائیکل کوریلا کی ریٹائرمنٹ تقریب میں خصوصی مہمان کے طور پر شریک ہوئے۔ اس سے قبل جون میں، انہوں نے امریکی صدر ڈونلڈ ٹرمپ کے ساتھ دو گھنٹے طویل اور غیر رسمی نجی لنچ کیایہ ملاقات اس وقت ہوئی جب محض ایک ماہ قبل پاکستان اور بھارت کے درمیان دہائیوں کی سب سے خونریز جھڑپ رونما ہو چکی تھی۔
یہ لمحہ اس لیے بھی غیر معمولی قرار پایا کہ ماضی میں صدر ٹرمپ پاکستان پر کھلے عام تنقید کرنے سے نہیں ہچکچاتے تھے، مگر اب منظر یکسر بدل چکا ہے، اور تعلقات کی فضا میں اعتماد و قربت کی خوشبو رچ بس گئی ہے۔
ایشیا پیسیفک فاؤنڈیشن کے سینئر تجزیہ کار مائیکل کوگل مین نے اسے یوں بیان کیا یہ محض تعلقات میں بہتری نہیں بلکہ ایک غیر متوقع اور شاندار نیا آغاز ہے۔ پاکستان نے اس غیر روایتی صدر کے ساتھ تعلقات کو نہ صرف سنبھالا بلکہ مہارت سے نئی بلندیوں تک پہنچا دیا ہے۔”
فنانشل ٹائمز کے مطابق، اس کامیابی کے پیچھے ایک جامع اور ہمہ گیر حکمتِ عملی ہے، جس میں دہشت گردی کے خلاف قریبی تعاون، صدر ٹرمپ کے بزنس نیٹ ورک تک رسائی، توانائی اور معدنی وسائل میں شراکت داری، کرپٹو کرنسی کے بڑے معاہدات، اور وائٹ ہاؤس تک مثبت اور مؤثر پیغام رسانی شامل ہیں۔
مارچ میں پاکستان نے داعش–خراسان کے ایک انتہائی مطلوب دہشت گرد کو گرفتار کر کے امریکا کے حوالے کیا، وہی شخص جو 2021 کے کابل ایئرپورٹ دھماکے کا ماسٹر مائنڈ سمجھا جاتا ہے۔ صدر ٹرمپ نے اپنے “اسٹیٹ آف دی یونین” خطاب میں اس کارروائی کو پاکستان کی عظیم کامیابی قرار دے کر کھلے دل سے تحسین کی۔
اپریل میں ایک اور اہم سنگ میل طے ہوا، جب ٹرمپ کی حمایت یافتہ کرپٹو کرنسی منصوبہ ورلڈ لبرٹی فنانشل اور پاکستان کے کرپٹو کونسل کے درمیان تاریخی معاہدہ ہوا۔ منصوبے کے بانیوں میں سے ایک نے پاکستان کے دورے کے دوران ملک کے وسیع معدنی وسائل کو “دنیا کا بےمثال خزانہ” قرار دیا۔
یہ تمام پیش رفت بھارت کے لیے کسی دھچکے سے کم نہیں، خاص طور پر اس وقت جب امریکا نے بھارتی درآمدات پر ٹیرف 50 فیصد تک بڑھا دیا، جبکہ پاکستان کے لیے یہ شرح محض 19 فیصد رکھی۔
خطے میں طاقت کا توازن ایک بار پھر حرکت میں آ چکا ہے، اور اسلام آباد–واشنگٹن کی یہ نئی قربت نہ صرف جنوبی ایشیا بلکہ عالمی سیاست میں ایک نئے باب کی بنیاد رکھ رہی ہے، ایک ایسا باب جو تاریخ کے دھارے کو بدلنے کی صلاحیت رکھتا ہے۔